Qiyməti əl yandıran diyetik məhsullar | Kilo itiririk, ya sərvət?

Artıq çəki və piylənmədən əziyyət çəkənlər, eləcə də sağlam qidalanmağa üstünlük verənlər diyetoloqların təklif etdiyi qidalanma paketlərinə üz tuturlar. Amma diyet saxlayaraq az yemək heç də çox yeməkdən ucuz başa gəlmir. Əksinə, diyet saxlayanlar diyetik məhsullara gündəlik az qala bir ətək pul xərcləyirlər.

Məsələn, çörəyi qida rasionundan çıxaranlar hazırda satışda daha çox “xlebsı” kimi təqdim olunan diyetik suxarilər alırlar ki, onların da bir qutusunun qiyməti 95 qəpik - 1 manat arasında dəyişir.

Satıcılar deyirlər ki, diyetik qidaların baha olmasının səbəbi xaricdən idxal olunmasıdır.

Diyetoloqlar qiymətlərin əl yandırdığını təsdiqləsələr də, bunun normal olduğunu bildirirlər: "Sağlam qida qatqısızdır, çətinliklərlə əldə olunur. Buna görə də ucuz deyil. 1 günlük diyet menyunun ən aşağı qiyməti 30 manatdır".

Azad İstehlakçılar Birliyinin sədri Eyyub Hüseynov deyir ki, diyetik məhsulların baha olması biznes hiyləsidir. Qiymətlərə isə heç kimin müdaxilə etmək hüququ yoxdur.