"15 evin kanalizasiyası buraya axır" | Çirkab suda "üzən" evlərdə dəhşətli vəziyyət - Baku TV

Masazır qəsəbəsinin Asif Həsənov küçəsində yerləşən evlər suyun içində qalıb.

Sakinlərin sözlərinə görə, bu vəziyyət illərdir davam edir.

“Qoxudan yatmaq olmur. Hər yerə müraciət etmişik, deyirlər ki, yaxşı olacaq, düzələcək, amma heç nə dəyişmir. Burada yaşayanların çoxu gedib, yalnız biz qalmışıq. Su indi çəkilib, bura lap pis olur, görsəniz, məəttəl qalarsınız”, – qəsəbə sakini bildirib.

“Vəziyyət çox pisdir. 15 min evin kanalizasiyası bura axır, bu gölün də başqa bir çıxış yeri yoxdur”, – başqa bir sakin qeyd edib.

Məsələ ilə bağlı Masazır bələdiyyəsindən bildirilib ki, sözügedən ərazidəki evlər uzun illər bundan əvvəl tikilib:

“Məsələ daimi olaraq yerli icra nümayəndəliyinin və bələdiyyənin nəzarətində saxlanılır. Sonuncu dəfə 2025-cı ilin yanvarın 12-də əraziyə baxış keçirilən zaman şəxsiyyəti məlum olmayan şəxs və ya şəxslər tərəfindən Qır gölündə qurutma və tikinti işlərinin həyata keçirilməsi halı müşahidə olunub. Qeyri-qanuni fəaliyyətin qarşısı alınıb və məktubla aidiyyəti üzrə müraciət edilib. Hazırda Qır gölünün səviyyəsinin artması son zamanlar havaların yağmurlu keçməsi və qrunt sularının qalxması ilə əlaqədardır”.

Qurumdan o da bildirilib ki, ərazidə mərkəzləşdirilmiş kanalizasiya sistemi yoxdur:

“Ətrafda yaşayan sakinlər çirkab sularını kustar üsullarla çəkilmiş borular vasitəsilə ya gölə axıdır, ya da “şambo” sistemindən istifadə edərək toplayırlar. Bu da qrunt sularının qalxmasına səbəb olur. Ona görə də yağışlı havalarda subasma hallarının yaşanmasına gətirib çıxarır. Ərazidə mərkəzləşdirilmiş kanalizasiya sistemlərinin çəkilməsi ilə bağlı aidiyyəti üzrə Dövlət Su Ehtiyatları Agentliyinə müraciət edilib”.