"Arada 35 illik ayrılıq olsa da, doğma kəndimizə qayıdacağıq" | QƏRBİ AZƏRBAYCAN XRONİKASI

“Qərbi Azərbaycan Xronikası” layihəsi çərçivəsində “Həyat Hekayəsi” verilişinin növbəti buraxılışı efirə gedib.

“Arada 35 illik ayrılıq olsa da, doğma kəndimizə qayıdacağıq” adlı veriliş Qərbi Azərbaycanın Ağbaba-Şörəyel mahalının Amasiya rayonunun Qaraçanta kənd sakini Pərvanə İbrahimovanın həyat hekayəsinə həsr olunub.

Onun sözlərinə görə, Qaraçantada cəmi 11 il yaşayıb: “Mən 1988-ci ildə 3 ay 7 gün məktəbimizdə dərsə gedə bildim. Ona görə 11 yaşlı xatirələrim mənim üçün həm əziz, həm doğma və eyni zamanda unudulmaz, daşlaşmış xatirələrdir və müqəddəsdir”.

Orta məktəbi heç vaxt unutmadığını və sinif otaqlarını daim yadında saxladığını deyən Qaraçanta sakini bildirib ki, əgər yenidən doğma kəndinə, Ağbaba-Şörəyel mahalına qayıtmaq imkanı olsa, Gümrünün yolu ilə gedib Çələb kəndindən öz kəndlərinə uzun müddət tamaşa edər, qaça-qaça məktəbə gedər, sinif otağına baxar:

“Kəndin qəbiristanlığında atamın nənəsinin məzarını, Seyidlər tayfasının gümbəzini ziyarət edərəm. Bizim bir çox nişanəmiz qalan ata evimizə gedərəm. Mənim orada məktəbli çantam da qaldı və mütləq gedib orada o çantamı axtararam”.

Ümidvar olduğunu deyən P.İbrahimova bildirib ki, dünyada ocaqdan isti heç nə yoxdur: "Ermənilər bizim ocağımızı söndürdülər, amma ümidimizi söndürə bilmədilər. O ümid var və biz mütləq öz doğma kəndimizə qayıdacağıq. 11 yaşlı daşlaşmış Qaraçanta xatirələrimi daha yeni xatirələr əvəz edəcək”.