"Aristokrat" klinikası ilə bağlı iddia | Səhiyyə Nazirliyi hərəkətə keçdi

Baku TV-nin qaynar xəttinə daxil olan şikayətlərə görə, Nərimanov rayonunda yerləşən “Aristokrat” Tibb Mərkəzində tibbi təhsili olmayan stomatoloqlar çalışır.

Kanalın əməkdaşları sözügedən həkimlərin – Sadiq Şükürov və Araz Məmmədzadənin qəbuluna yazılaraq məsələni aydınlaşdırmağa çalışıblar. Məlum olub ki, həmin şəxslər heç bir məhdudiyyət olmadan həkim kimi fəaliyyət göstərirlər.

Daha sonra “Aristokrat” Tibb Mərkəzinin mətbuat katibi Aqil Qarayev məsələ ilə bağlı açıqlama verib.

“Araz Məmmədzadə mərkəzdə ortopedik stomatoloq kimi çalışır və bu sahə üzrə müvafiq təhsil, eləcə də ixtisas sənədlərinə malikdir. Sadiq Şükürov isə burada diş texniki kimi fəaliyyət göstərir və pasiyentlərə tibbi müdaxilə etmir”, – deyə o qeyd edib.

Məsələ ilə bağlı Səhiyyə Nazirliyindən bildirilib ki, Analitik Ekspertiza Mərkəzi tərəfindən sözügedən həkimlərlə bağlı faktlar ciddi araşdırılacaq və ictimaiyyətə bu barədə məlumat veriləcək.