Diplomsuz işləyən diş həkimlərinin saxtakarlığı | Analitik Ekspertiza Mərkəzindən "Baku TV"yə cavab

Baku TV-nin efirində yayımlanan saxta stomatoloqlarla bağlı videomaterialla əlaqədar artıq araşdırmalara başlanılıb.

Bu barədə Baku TV-yə Səhiyyə Nazirliyinin Analitik Ekspertiza Mərkəzindən məlumat verilib.

Bildirlib ki, “Əhalinin sağlamlığının qorunması haqqında” Qanunun 12-ci maddəsinə əsasən, həkimlik fəaliyyətini yalnız ali tibbi təhsili təsdiq edən diplomu və müvafiq dövlət qeydiyyatı olan şəxslər həyata keçirə bilər. Orta tibb təhsili alan şəxslərin həkim-stomatoloq kimi fəaliyyət göstərməsi qanunvericiliyə görə yolverilməzdir.

“Tibb kadrlarının vahid dövlət registrində olan məlumata əsasən, Hafiz İsazadə orta tibb təhsilli diş texniki, Turab Məmmədli orta tibb təhsilli ortoped-stomatoloq kimi qeydiyyatdadır.

Azərbaycan Respublikasının “Dövlət nəzarəti haqqında” Qanununun 6-cı maddəsinə və “Səhiyyə sahəsində nəzarətin həyata keçirilməsi Qaydaları”na uyğun olaraq, Analitik Ekspertiza Mərkəzi yalnız təsdiqedici sənədlərlə daxil olan rəsmi müraciətlər əsasında araşdırma aparır. Bu müraciətlər hüquqi əsaslarla qiymətləndirilir və zərurət yarandıqda müvafiq müəssisələrdə plandankənar yoxlamalar həyata keçirilir.

Mediada yayımlanan sözügedən fakt üzrə məsələ Mərkəzin işçi qrupu tərəfindən araşdırılacaq, nəticələr barədə ictimaiyyətə əlavə məlumat veriləcək", – deyə Səhiyyə Nazirliyinin Analitik Ekspertiza Mərkəzinin Baku TV-nin sorğusuna cavabında qeyd olunub.