"ASAN Login" ilə bağlı insanları narahat edən məqam

“ASAN Login” – yəni dövlət və özəl qurumlar tərəfindən təklif olunan elektron xidmətlər paketindən istifadə üçün yaradılan vahid giriş sistemi. Burada prosesin daha sadə, rahat və anlaşılan olması nəzərdə tutulub.

Lakin əksər “ASAN Login” istifadəçilərinin verdiyi məlumata görə, sistemdə yenicə qeydiyyatdan keçmək istəyərkən və ya köhnə qeydiyyatı yeniləyərkən giriş etmək lazım gəlir ki, bu zaman da müəyyən çətinliklər ortaya çıxır. Belə ki, yeni nömrə ilə “ASAN Login”də qeydiyyat zamanı videotəlimat prosesindən keçmək lazımdır. Təlimatda isə müəyyən şərtlər var. Misal üçün, eynək taxmamaq kimi. Əgər şəxs eynəksiz görə bilmədiyi üçün təlimatları həyata keçirə bilmirsə, bu zaman da qeyd edilən şərtə əməl etməmiş olur.

Məsələ ilə bağlı İnnovasiya və Rəqəmsal İnkişaf Agentliyindən bildirilib ki, müraciətlərin qiymətləndirilməsi zamanı bu hallar nəzərə alınır: “Bu günə kimi bizim imtina verdiyimiz müraciətlərin səbəbi vətəndaşın eynək taxması və ya bu kimi şeylər olmayıb. İmtinaların əsas səbəbi odur ki, insanlar suallara cavab verməyiblər, vəsiqəni göstərməyiblər”.

Onu da əlavə edək ki, “ASAN Login” şifrəsini yazaraq sistemə daxil olan vətəndaşlar rahat şəkildə yeni nömrələrini əlavə edə bilərlər.