"Azərbaycanda keyfiyyətli film musiqisi yaza bilmərəm" | Bəstəkar Ruhin İsmayılov

Müasir dövrdə musiqi sənayesi sürətlə dəyişsə də, sənət və yaradıcılıq anlayışlarının aktuallığı hələ də müzakirə mövzusudur.

Baku TV-nin suallarını bu dəfə bəstəkar, aranjimançı və prodüser Ruhin İsmayılov cavablandırıb.

O, Türkiyə serial və filmlərinin musiqilərinin yadda qalmasının səbəblərindən danışarkən bildirib ki, keyfiyyətli ekran işi musiqisinin hazırlanması üçün kifayət qədər vaxt tələb olunur:

“Bir musiqi üçün minimum altı ay vaxt lazımdır. Bizdə isə əksinə olur. Elə hallar var ki, deyirlər, bir aya filmin premyerasıdır və musiqi hazır olmalıdır. Bir aya necə keyfiyyətli musiqi ərsəyə gətirmək olar? Həm büdcə yoxdur, həm də tələsdirirlər ki, yaxşı iş ortaya çıxsın”.

Ruhin İsmayılovun sözlərinə görə, bu sahədə əsas problem düşüncə tərzinin dəyişməməsidir:

“Professionalizm çox azdır. Əgər mütəxəssis çatışmırsa, xaricdən gətirsinlər. Bir filmdə iki bəstəkar, iki rejissor, iki ssenarist olsun. Bu bizim üçün də təcrübə olar və film sahəmizin inkişafına kömək edər”.

Prodüser mahnı sektorunda bəstəkar əməyinə dəyər verən ifaçılar barədə də danışıb. Onun sözlərinə görə, bu məsələdə ən nümunəvi sənətçilərdən biri Röyadır:

“Mənə elə gəlir ki, musiqiçilərin haqqını ən yaxşı şəkildə verən müğənnilərdən biri Röyadır”.