"Azəriqaz" mənzillərin qaz təchizatlarında nöqsanlar aşkarladı

“Azəriqaz” fevral ayında 110 mindən çox ev və obyektin qaz təchizatında müayinələr aparıb.

Bunu qurumun şöbə rəisi İlkin Behbudov bildirib.

Onun sözlərinə görə, nəticədə 60 min civarında nöqsanlar qeydə alınıb. Həmçinin 4855 mənzildə xüsusi təhlükəli vəziyyət müşahidə edildiyindən qaz təchizatı məcburi qaydada dayandırılıb. Bu, həmin mənzillərdəki cihazların əksəriyyətinin istismar müddətinin bitməsi ilə bağlı olub.

İlkin Behbudov qeyd edib ki, müayinələr aparılan mənzillərin vanna otaqlarındakı su qızdırıcılarının əksəriyyəti 15 ildən artıq istifadə olunan qurğulardır. Onların texniki pasportunda isə istifadə müddəti 10 ildən aşağı göstərilib.

“Azəriqaz” rəsmisi onu da əlavə edib ki, müayinələr aparılan bir çox mənzillərin vanna otağında qaz cihazı quraşdırılması nəzərdə tutulmasa da, sonradan oradan həmin cihazların yerləşdirildiyi müəyyən edilib:

“Həmçinin müayinələr göstərib ki, əksər evlərdə qazın sızmasını bildirən detektor yoxdur. Bir sıra mənzillərdə mətbəx otaqlarında yerdəyişmələrə rast gəlinir. Həyət evlərində isə tüstü bacalarında və qaz qurğularında rezin birləşmələrdə müəyyən problemlər aşkarlanıb”.

O da vurğulanıb ki, “Azəriqaz” mənzillərdə və obyektlərdə müayinələri bu ilin noyabrın 1-nə qədər yekunlaşdırmalıdır.