"Azəristiliktəchizat" qış mövsümü ilə bağlı əhaliyə xəbərdarlıq etdi

Bakı şəhərində və rayonlarda istiliyin verilişi mövsümü bu gündən başlayıb. Proses növbəti ilin aprel ayının 15-nə qədər davam edəcək.

Bu barədə “Azəristiliktəchizat” Açıq Səhmdar Cəmiyyətindən verilən məlumatda qeyd olunub.

Bildirilib ki, cari mövsümdə qurum tərəfindən Bakı şəhəri və respublikanın regionlarında balansında olan 561 qazanxana və 88 istilik məntəqəsi vasitəsilə 3 min 863 yaşayış binasının, 184 minə yaxın mənzilin, 285 orta məktəbin, 127 uşaq bağçasının, 151 səhiyyə müəssisəsinin və 2 min 500-ə yaxın sosial və təsərrüfat hesablı obyektlərin istiliklə təmin edilməsi nəzərdə tutulur.

Respublikanın dağ rayonlarında isə noyabrın 1-dən etibarən istilik verilişinə başlanılıb. Ölkə üzrə 14 dağ rayonundan 9-da “Azəristiliktəchizat”ın 39 qazanxana və 1 istilik məntəqəsi fəaliyyət göstərir və mövsüm növbəti ilin may ayının 1-nə qədər davam edəcək.