"CarsCharge" yeni enerji doldurma məntəqəsini istifadəyə verdi

“CarsCharge” elektrik doldurma şəbəkəsi “Rahat” və “Bolmart” supermarket şəbəkələri ilə əməkdaşlığa başlayıb.

Bununla bağlı mətbuata açıqlama verən “CarsCharge” MMC-nin baş direktoru Polad Talıbov şirkətin təkcə Bakıda yox, həm də bütün Azərbaycan üzrə elektromobillərin enerji yığması üçün stansiyalar quraşdırdıqlarını diqqətə çatdırıb.

O qeyd edib ki, müştərilər sadəcə QR-koddan istifadə etməklə bütün stansiyalarımızda xidmət ala, yəni avtomobillərini maksimal dərəcədə doldura bilərlər.

“Artıq yanvar ayından bu yana stansiyalarımızın sayı 20-ni keçib və bu say getdikcə çoxalacaq. Qiymətlərə gəlincə, bizim stansiyalarda bir saat 60 kilovoltluq stansiya üçün 18 manat, 40 kilovoltluq stansiya üçün 12 manat, 92 kilovoltluq axırıncı stansiyalarımız üçün isə 27 manat təşkil edir”, – deyə P.Talıbov söyləyib.

Azərbaycanda elektromobillər üçün enerji doldurma stansiyalarının mobil tətbiqini və platformasını hazırlayan “F-5” MMC-nin təsisçisi Faiq Abdullayev mətbuata açıqlamasında hazırda yaratdıqları platformanın “CarsCharge” MMC-nin stansiyalarında fəaliyyət göstərdiyini bildirib.

“MDB ölkələri arasında və bizim ərazidə yeganə şirkətik ki, bu platformanı hazırladıq və uğurla istifadəyə verdik. Hazırda bizim platformamız “CarsCharge” MMC-nin stansiyalarında fəaliyyət göstərir və gələcəkdə daha çox stansiyalarda mobil tətbiqimizi görəcəksiniz”, – deyə təsisçi qeyd edib.