"Çiyələkləri yığıb tökmüşəm oraya" | Fermerlərin aylarla çəkdiyi zəhmət niyə hədər getdi? - Baku TV

Hazırda Cəlilabadın əksər kəndlərində çiyələk yığımı davam edir. Məhsul bol olsa da, qiymətin aşağı düşməsi fermerləri çətin vəziyyətə salıb.

Onların sözlərinə görə, aylarla çəkilən zəhmət və qoyulan sərmayə demək olar ki, hədər gedib.

“Bir kiloqram çiyələyin qiyməti 2 manat 50 qəpikdən 1 manata düşdü. Bir manat olanda yenə də işçi pulunu çıxarmaq olurdu. Amma son üç-beş gündə məhsulun kilosu 20 qəpiyə enib. Bu qiymətə çiyələk yığmaq sərf etmir. 100 kilo məhsul 20 manat edir, bir işçinin gündəlik haqqı isə 30 manatdır”, – fermerlərdən biri bildirib.

Digər fermer isə bu il həm məhsuldarlığın, həm də qiymətin aşağı olduğunu deyib:

“Çiyələk bu il çox zəif oldu. Məhsuldarlıq da zəifdir, qiymət də. Havaların yağışlı keçməsi məhsulu zay elədi. Çiyələyin çoxunu sahədə yerə tökdük. Fəhlə qiymətləri də bahadır. Yəni bu gün yığdığımız məhsul fəhlə pulunu belə ödəmir”.