"Dağa-dərəyə aparırdılar ki..." - İşçilərin başına oyun açıldı? - "Boyun qaçırırlar..." - Baku TV

“Upsilon” şirkəti 2024-2025 ci illərdə Lerikdə internet xətti çəkilişlərinə başlayıb. Layihə çərçivəsində rayon üzrə 40-a yaxın şəxs işə cəlb olunub və onlarla əmək müqaviləsi imzalanıb.

Lakin işçilərin sözlərinə görə, işlərin başlamasından 1-2 ay sonra işəgötürən tərəf əməkhaqlarını ödəyə bilməyib.

“2024-cü ilin mayından iyulunadək müqavilə ilə işlədim. Aylıq 1000 manat razılaşmışdıq, iki ay işlədim – 2000 manat alacağım var. Mənim VÖEN-imdən istifadə etdilər, pullar mənim hesabıma gəlib çıxırdı. İndi adıma 3200 manat vergi borcu yaranıb, amma ödəmirlər”, – deyə şikayətçilərdən biri bildirib.

İşçilər həmçinin ağır şəraitdə çalışdıqlarını vurğulayırlar: “Bizi dağlıq ərazilərə aparırdılar, yükləri çiyinlə daşıyırdıq, amma pulumuzu ala bilməmişik”.

Məsələ ilə bağlı şirkətdən bildirilib ki, “Upsilon” Lerikdə 3-4 subpodratçı sahibkarla müqavilə bağlayıb.

“Lerikdə işlər tam yekunlaşmayıb. Burada söhbət sənədləşmə və layihə işlərindən gedir. Çalışırıq ki, yaxın 2-3 ay ərzində sənədləşmə işləri bitsin. Bundan sonra subpodratçı sahibkarlara ödənişlər tam veriləcək”, – deyə şirkətin açıqlamasında qeyd olunub.