"Gecə cumur, heç kim yaxın durmur" | Əhalinin əsəbi tarıma çəkildi: "Ayaqaltında qalmışıq" - Baku TV

Gəncə şəhəri Xətai prospekti 84 və 87 saylı binaların sakinləri yaşadıqları ərazidə aparılan yeni tikintilərin onlar üçün ciddi çətinliklər yaratdığını iddia edirlər.

Baku TV-nin qaynar xəttinə müraciət edən sakinlər yolların daraldığını və məhəllənin baxımsız vəziyyətə düşdüyünü bildiriblər.

Onların sözlərinə görə, ərazidə əvvəllər qarajlar və uşaqların oynadığı geniş sahə olub. Qarajlar söküldükdən sonra sakinlərə burada park salınacağı və uşaqlar üçün şərait yaradılacağı bildirilsə də, bunun əvəzinə yeni tikililər inşa edilib.

Sakinlər həmçinin ərazidə baş vermiş yanğın hadisəsini də xatırladıblar. Onların sözlərinə görə, binalardan birində yanğın baş verərkən sıx tikililər və dar yollar səbəbindən Fövqəladə Hallar Nazirliyinin texnikasının əraziyə daxil olması çətinləşib.

“Biri ölsə, cənazəni çıxarmağa yer yoxdur. Yanğın oldu, yanğınsöndürənlər əraziyə girə bilmədi. İki nəfər öldü, evlər də yanıb məhv oldu”, – deyə sakinlərdən biri bildirib.

Məsələ ilə bağlı Gəncə Şəhər İcra Hakimiyyətinin verdiyi məlumata əsasən, sözügedən ərazidə hazırda hər hansı tikinti işləri aparılmır. Daha əvvəl həyata keçirilmiş tikinti işlərinin qanunauyğunluğu isə aidiyyəti qurumlarla birgə araşdırılacaq.

Sakinlərin məhəllənin abadlaşdırılması ilə bağlı müraciətinə gəlincə, bildirilib ki, hazırda Gəncə şəhərində mərhələli şəkildə abad məhəllələrin salınması istiqamətində işlər görülür.

Qeyd edək ki, Baku TV-nin çəkilişdən sonra ərazidə aidiyyəti üzrə təmizlik işləri aparılıb.