"Həmin adam başqa yolu göstərir ki..." | Bələdiyyə sədri problemlə bağlı nə dedi? - Baku TV

Asfalt üzünə həsrət qalan yollar, dizə çıxan palçıq. Söhbət təxminən 10 min sakini olan Cəlilabad rayonunun Maşlıq kəndindən gedir.

Kənd sakini Nizami Alışanov Baku TV-nin qaynar xəttinə müraciət edərək bildirib ki, həm evinə gedən yol, həm də ümumiyyətlə kənd yollarının bərbad vəziyyətdə olması ilə bağlı dəfələrlə aidiyyəti qurumlara müraciət olunsa da, problem həll olunmayıb.

“Yolumuz illərdir bu gündədir. Dəfələrlə maşın yolda sönüb qalıb. Vəziyyət bərbaddır”, – deyə sakin narazılığını ifadə edib.

Məsələ ilə bağlı Muğan bələdiyyəsinin sədri Amalya Əmənova bildirib ki, Nizami Alışanovun evinə gedən yol şəxsən onun tərəfindən yerində baxış zamanı qiymətləndirilib.

“Həmin yol həqiqətən də çox bərbad vəziyyətdə idi. Nəqliyyat keçə bilmirdi, məktəblilər məktəbə gedə bilmirdi. Biz ora qreyder saldıq, sonra isə daş-çınqıl materialları tökərək yolu təmir etdirdik. Lakin müraciət edən şəxs öz yolunu deyil, başqa bir yolu göstərərək onun təmirini tələb edir”, – deyə bələdiyyə sədri qeyd edib.

Onun sözlərinə görə, Maşlıq kəndində kənddaxili yolların böyük əksəriyyəti hələ də torpaq vəziyyətindədir və bu yolların bir çoxunun ümumiyyətlə təməli olmayıb.

“Bələdiyyənin maliyyə imkanları əsasən əhalidən toplanan torpaq və əmlak vergiləri, eləcə də rüsum və icarə haqları hesabına formalaşır. Əhali vergiləri vaxtında ödədiyi təqdirdə, həmin vəsait hesabına yolların təmirinə hazırıq”, – deyə Amalya Əmənova əlavə edib.