"Heydər Əliyev adına Beynəlxalq Təhsil Qrantı" proqramı təsis edilib

Prezident İlham Əliyev “Heydər Əliyev adına Beynəlxalq Təhsil Qrantı” proqramının təsis edilməsi haqqında Sərəncam imzalayıb.

Ali təhsil müəssisələrində əcnəbilərin təhsilinə dəstək vermək məqsədilə təsis edilən qrantı İslam Əməkdaşlıq Təşkilatına üzv ölkələrin, Qoşulmama Hərəkatına üzv ölkələrin, həmçinin İnkişaf etməkdə olan Kiçik Ada Dövlətləri qrupuna daxil olan ölkələrin, eləcə də xalqımızla etnik, tarixi və mədəni bağlara malik xalqların və milli azlıqların yaşadığı ölkələrin vətəndaşları ala biləcək.

Qrant bakalavriat, magistratura, doktorantura səviyyələrində təhsil üçün nəzərdə tutulub və 2024—2025-ci tədris ilindən başlayaraq hər il 100 təhsil qrantı olmaqla 5 il müddətində verilir.

Azərbaycanın hesabına ödənilən təhsil haqqı, viza, qeydiyyat, yataqxana və ya mənzil kirayəsi, gündəlik qidalanma, tədris ədəbiyyatı ilə təminat, nəqliyyatdan istifadə, kommunal xidmətlər, tibbi yardım və təhsil qrantı alacaq şəxslərin ildə bir dəfə ölkələrinə gediş-gəliş xərclərini əhatə edir.