"İnsan anlamadığı dildə necə dua edə bilər?!" - Namazı hansı şəkildə qılmaq olar? - AMİN

“Amin” verilişinin yeni buraxılışında ilahiyyatçı Elvüsal Məmmədovla namaz ibadəti haqqında fikir mübadiləsi aparılıb.

O, namazın insan həyatındakı rolundan söz açıb.

“İnsan sosial varlıqdır. Onun həmişə ünsiyyətə ehtiyacı olub. Namaz Allahla rabitəmizi təmin edir. Bu baxımdan namaz insanı tənha qalmaq qorxusundan xilas edir, həmçinin daxilimizdəki ruhun canlı qalmasını təmin edir”, – deyə ilahiyyatçı bildirib.

Elvüsal Məmmədov həmçinin namazın dilinə və universal xarakterinə dair fikirlərini bölüşüb:

“Namaz əvvəldən ərəb dilində qılınıb və indiyə qədər də hər yerdə ərəb dilində qılınır. Lakin bəzi insanlar namazın hər xalqın öz dilində qılınmalı olduğunu deyirlər. İslam ümumdünya dini olmaq iddiasındadır. Ümumdünya dini olmaq üçün sənin vahid ibadət sistemin olmalıdır. Bu nə deməkdir? Yəni ibadət sistemi xalqdan xalqa, ölkədən ölkəyə, dövrdən dövrə dəyişməməlidir. Əgər biz namazı başqa dildə qılarsaq, o, ayin olmaqdan uzaqlaşıb duaya çevrilər”.