"Psixoloq pasiyentin ruhu ilə məşğul olmalıdır" | Acı çəkməyən adam müdrik ola bilərmi? - AMİN

“Amin” verilişinin yeni buraxılışında ilahiyyatçı Elvüsal Məmmədov ilə ilahiyyat və psixologiya mövzusunda fikir mübadiləsi aparılıb.

Onun sözlərinə görə, dinlərin əsas vəzifəsi insanın ruhi sağlamlığını təmin etməkdir:

“Ruh diqqətdən kənarda qalanda qəddar insana çevrilirik. Buna görə də diqqətimizi ruha yönəltməliyik. Dinlərin də əsas vəzifəsi ruhla praktiki müstəvidə məşğul olmaqdır. Amma bu gün dinlər o vəzifədən uzaqlaşıb başqa məsələlərlə məşğul olanda insanları mənəvi baxımdan tərbiyə edə bilmir”.

E.Məmmədov həmçinin müdriklik haqqında danışıb. Onun sözlərinə görə, həqiqi müdriklik həyatın sərt sınaqlarından, yaşanan acılardan və emosional dalğalanmalardan doğur:

“Əgər insan heç ağlamırsa, gülmürsə, kədərlənmirsə, o, emosional baxımdan ya sönük, ya da ruhu tamamilə ölmüş, qəddar biridir. Acı çəkməyən insan müdrik ola bilməz. Əgər dünya həyatına imtahan kimi baxırıqsa, burada mütləq çətinlik olmalıdır. Məsələn, tələbə imtahan prosesində iztirab çəkmirsə, imtahandan sonra yiyələndiyi ixtisasın dəyərini heç vaxt bilməz. Yalnız çətinlik çəkən insan mütəxəssis olmağın nə qədər ağır olduğunu dərk edər və öz üzərində daha çox çalışar”.