"İşi mən yubatdım, amma..." | Tikinti şirkəti vətəndaşların başına oyun açıb? - Baku TV

Xətai rayonunun Məhəmməd Hadi küçəsində yaşayan vətəndaşlar mənzillərinin təmiri ilə bağlı problem yaşadıqlarını bildirirlər.

Şikayətçilərdən birinin sözlərinə görə, 2025-ci ilin may ayında mənzilin təmiri üçün “IS Qrup” şirkəti ilə müqavilə bağlayıb və işlərin 5 ay ərzində başa çatdırılaraq təhvil verilməsi nəzərdə tutulub. Lakin müqavilədə nəzərdə tutulan müddət başa çatsa da, mənzildə təmir işləri tam yekunlaşdırılmayıb.

Başqa bir şikayətçi isə vəziyyəti belə izah edib: “Müqaviləyə əsasən, təmir üçün 57 min manat ödəməli idik və bu məbləğin hamısını ödəmişik. Əlavə ödənişləri də nəzərə alsaq, şirkətə ümumilikdə 65 500 manat vermişik”.

Şikayətçilər təmir zamanı müxtəlif problemlərin də yarandığını bildiriblər. Onların sözlərinə görə, elektrik və santexnika işlərində çatışmazlıqlar olub və bəzi işlərə şəxsən müdaxilə etmək məcburiyyətində qalıblar.

Məsələ ilə bağlı “IS Qrup” şirkətinin rəhbəri İlyas Mehmanoğlu isə bildirib ki, vətəndaşların iddiaları doğru deyil. Onun sözlərinə görə, işlərin ləngiməsində əsas səbəb sifarişçinin özü olub.

“Təmirin 3 ay yubanmasının səbəbkarı mənəm. Amma işlərin gecikməsində yalnız şirkət məsul deyil. Ceyhun adlı vətəndaş dəfələrlə işləri dayandırdı və müxtəlif səbəblərdən təmir prosesinə müdaxilə etdi. Buna baxmayaraq, oktyabr ayının sonuna qədər evin təhvil veriləcəyini bildirmişəm”, – deyə şirkət rəhbəri sözlərinə əlavə edib.