"Kuryer yağışda 5 saat gözləsin?!" - Sifarişi götürməyən müştəri özünü necə haqlı gördü? - Baku TV

Kuryer pizza sifariş edən müştərinin sifarişini ünvana çatdırır. Lakin nə qapını açan olur, nə də telefon zənglərinə cavab verən.

Təxminən 20 dəqiqə gözləyən kuryer sifarişi binanın mühafizəçisinə təhvil verib, müştəriyə bununla bağlı məlumat göndərir. Lakin bir saat sonra müştəri əlaqə saxlayaraq sifarişin yenidən gətirilməsini və ya pulun geri qaytarılmasını tələb edir.

Çatdırılma şirkətlərində çalışanlar tərəfindən bu kimi şikayətlərin sayı artıb. Onların sözlərinə görə, belə vəziyyət yarandıqda cəzalanan yenə kuryerlər olur.

“Bir neçə gün əvvəl yağış yağanda 4-5 saat gözləmişəm. Dəstək xidmətindən cavab gec gəldi. Kuryer yağışda, soyuqda 5 saat niyə gözləməlidir?!”, – kuryer Baku TV-yə mövzu ilə bağlı açıqlamasında deyib.

Kuryerlər bildirirlər ki, harasa şikayət edəndə və ya etiraz edəndə onların profilləri bloklanır. Mövcud vəziyyətlə bağlı ölkədə fəaliyyət göstərən “Wolt” və “Bolt” çatdırılma şirkətlərinə sorğu ünvanlanıb.

“Bolt”dan həm müştərilərin, həm də kuryerlərin maraqlarının qorunmasına xüsusi önəm verildiyi bildirilib:

“Hər bir şikayət və müraciət ayrı-ayrılıqda konkret vəziyyət nəzərə alınaraq araşdırılır. Əgər kuryer sifarişi qəbul edib, lakin əsaslı səbəb olmadan çatdırmanı həyata keçirməyibsə, bu hal araşdırma predmetinə çevrilir. Bununla yanaşı, kuryerin müştəriyə çatdırmanın mümkün olmadığı hallarda sifarişi geri qaytarması (məsələn, müştərinin əlaqə saxlamaması və ya ünvan üzrə çatdırmanın mümkün olmaması) nəzərə alınır və bu hallar avtomatik olaraq kuryerin əleyhinə qiymətləndirilmir”.