"Məqsədimiz odur ki, tələbələr..." | WUF13-lə bağlı növbəti məlumatlandırma sessiyası - Baku TV

Bakıda keçiriləcək Ümumdünya Şəhərsalma Forumunun 13-cü sessiyası ilə əlaqədar məlumatlandırma sessiyası keçirilib.

Bakı Dövlət Universitetində baş tutan sessiyada universitetin tələbə və müəllim heyəti iştirak edib.

Çıxış edənlər bildiriblər ki, Azərbaycan son illərdə bir çox nüfuzlu beynəlxalq tədbirlərə uğurla ev sahibliyi edib və WUF13 də onlardan biridir.

WUF13 Azərbaycan Əməliyyat Şirkətinin kommunikasiya meneceri Emin Hüseynzadə bildirib ki, WUF13 Festivalı Ümumdünya Şəhərsalma Forumunun 13-cü sessiyasının tanıdılması məqsədilə təşkil olunur.

Onun sözlərinə görə, festival Azərbaycanın doqquz müxtəlif şəhərində keçirilib və son tədbir Bakıda baş tutur:

“Hazırda Bakı Dövlət Universitetində məlumatlandırma sessiyasındayıq. Burada həm Bakı Dövlət Universitetinin, həm də Azərbaycan Memarlıq və İnşaat Universitetinin tələbələri iştirak edirlər. Məqsədimiz tələbələrin tədbir haqqında məlumatlanması, forumda aktiv iştirak etməsi və əldə etdikləri məlumatları digər tələbələrə, eləcə də Bakı sakinlərinə çatdırmasıdır”.

Qeyd edək ki, mayın 17-22-də Bakıda keçiriləcək Ümumdünya Şəhərsalma Forumunun 13-cü sessiyası ilə bağlı ictimaiyyətin məlumatlandırılması məqsədilə Quba, Lənkəran, Qəbələ, Şəki, Mingəçevir, Gəncə, Xankəndi və Sumqayıtda da WUF13 festivalları təşkil olunub.