"Necə, nəyinə baxacaqlar onun?!" | Əlillik süni intellektlə qiymətləndiriləcək - Baku TV

2026-cı ildən etibarən əlilliyin qiymətləndirilməsində süni intellektin imkanlarından istifadə olunacaq.

Bu barədə DOST Rəqəmsal İnnovasiyalar Mərkəzinin direktoru Kənan Əkpərov məlumat verib.

Əlillik kimi həssas bir mövzunun süni intellekt vasitəsilə qiymətləndirilməsi cəmiyyətdə müxtəlif suallar doğurub. Bəzi vətəndaşlar bunun müsbət nəticələr verəcəyini desələr də, digərləri sözügedən məsələyə ehtiyatla yanaşırlar.

“Həkim düzgün baxa bilmir, süni intellekt bunu necə edəcək?! Texnologiyaya etibar etmək olar, amma bu qədər də yox”, – vətəndaşlardan biri söyləyib.

Digər bir paytaxt sakini isə məsələyə fərqli mövqe sərgiləyib: “Bu, zamanın tələbidir. Axır-əvvəl tətbiq olunmalı idi”.

DOST Rəqəmsal İnnovasiyalar Mərkəzinin departament rəhbəri Elxan Xəlilov bildirib ki, əlilliyin təyin olunmasında süni intellektin tətbiqi hazırda məsləhət xarakteri daşıyır.

Onun sözlərinə görə, vətəndaşların bütün analiz və diaqnozları kodlaşdırılmış şəkildə sistemə daxil edilir və yekun qərar verilənədək həmin məlumatların konkret hansı vətəndaşa aid olduğu nə həkimə, nə də süni intellektə məlum olur. Süni intellekt yalnız Səhiyyə Nazirliyindən daxil olan məlumatları təhlil edir, əvvəlki qərarları analiz edərək məlumatların düzgünlüyünü qiymətləndirir və əlilliyin qrupu, növü və müddəti ilə bağlı həkimlərə məsləhət xarakterli rəy təqdim edir.

Həmçinin bildirilib ki, süni intellektin yanlış qərar vermə ehtimalı 10-20 faiz arasında dəyişir. Vətəndaşlar verilən qərardan narazı qaldıqları halda Əmək və Əhalinin Sosial Müdafiəsi Nazirliyinə yazılı şəkildə müraciət edə bilərlər.