"Nikosayağı"nın işi məhkəmədə | Blogerin alacağı cəza

“Nikosayağı” adı ilə tanınan bloger Nicat Şakirlinin törətdiyi yol-nəqliyyat hadisəsi ilə bağlı aparılan ibtidai istintaq yekunlaşıb.

Cinayət Məcəlləsinin 263-1.3 – nəqliyyat vasitələrini idarə etmək hüququ olmayan şəxs tərəfindən yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin ölümünə səbəb olduqda maddəsi ilə ittiham olunan blogerin işi baxılması üçün Bakı Ağır Cinayətlər Məhkəməsinə göndərilib.

Hüquqşünas Cavid Cəfərovun sözlərinə görə, həmin maddənin sanksiyasında 5 ilədək sürücülük hüququndan məhrum etmə və 8 ilədək azadlıqdan məhrum etmə var:

“Amma dəymiş ziyanın aradan qaldırılması istiqamətində zərərçəkənin ailə üzvlərinə, hüquqi varisinə qarşı müsbət addım atılmış olarsa, bunu məhkəmə yüngülləşdirici hal kimi nəzərə ala bilər”.

Cinayət Məcəlləsinin sözügedən maddəsi ilə cinayət məsuliyyətinə cəlb olunan şəxs əgər ictimai təhlükə yaratmırsa, həmin şəxs barəsində həbs qətimkan tədbiri öncədən seçilməməsi məhkəmə tərəfindən məqsədəmüvafiq hal kimi qiymətləndililir. Onun barəsində sanksiyanın tətbiq olunması, törətdiyi cinayət əməlinin sübuta yetirilməsindən sonra mümkün ola bilər.

Qeyd edək ki, əgər məhkəmə bloger haqqında 5 ildən az cəza hökmü verərsə, o, cəzasını məntəqə tipli cəzaçəkmə müəssisəsində, cəzası 5 ildən artıq olarsa, rejimli cəzaçəkmə müəssisəsində çəkəcək.