"O vaxtın gənclərinin etmədiyini edirdim" | Bakı sakini niyə gözyaşı tökdü? - O VAXTLAR

“O vaxtlar” verilişinin budəfəki qəhrəmanı Bakı sakini Minarə Xəlilova olub.

Uşaqlıqdan jurnalistikaya böyük maraq göstərən Minarə xanım bu sevgisinin necə başladığını belə izah edib:

“Mən elə hesab edirəm ki, televiziyada doğulmuşam. Gənc yaşlarımdan müxbir işləmişəm, həmçinin bir çox nəşrlərdə məqalələrim dərc olunurdu. Fotoqrafiyaya da böyük marağım var idi. Öz fotoaparatım var idi, hətta eyvanda özüm üçün böyük bir fotostudiya yaratmışdım. O vaxtlar bunu etmək çox çətin idi. Bir gün evə gəldim və gördüm ki, heç nə qalmayıb, sanki hər şey süpürülüb atılıb. Anamdan soruşdum ki, əşyalarım haradadır? Anam isə belə cavab verdi: “Rədd ol, ərə get, bəsdir bu işlərlə məşğul olursan”.

Minarə xanım eyni zamanda evlilik həyatından və mərhum həyat yoldaşından da söz açıb:

“Mən 26 yaşında ailə həyatı qurmuşam. Çox gözəl gəlin olmuşam, qayınanam məndən razı idi. Həyat yoldaşımdan danışsam, bəlkə də şoka düşəcəksiniz. O, dəniz neftçisi idi. Biz dörd il Vyetnamda yaşamışıq. Təzə nişanlanmışdıq, harada işlədiyini bilmirdim. Yoldaşımgilə zəng etdim, qayınanam dedi ki, Ülfət dənizdədir. Mən də düşünürdüm ki, qışın soyuğunda o necə dənizə gedir, dənizdə nə işi var? Sonradan öyrəndim ki, o, dəniz neftçisi imiş. Allah rəhmət etsin, həyatdan çox tez köçdü. Amma böyük xatirələrimiz qaldı”.