"Ödənişini etmirsən, satışa qoyuruq" | Vətəndaşın avtomobillərinə niyə əl qoyuldu? - Baku TV

Xətai rayonunda lizinq şirkəti ilə müştəri arasında narazılıq yaranıb.

Şikayətçi Murad Qədimov “Xalq 11” lizinq şirkətindən 8 ədəd avtomobil götürdüyünü, lakin sonradan ciddi problemlərlə üzləşdiyini bildirir.

Onun sözlərinə görə, avtomobillərdən 3-nü satmaq istəyərkən hər bir nəqliyyat vasitəsinə 4000 manatdan çox cərimə yazıldığı məlum olub. Məsələ ilə bağlı şirkətə müraciət etsə də, iki ay ərzində problem həllini tapmayıb. Eyni zamanda şirkət avtomobillərə yol vərəqəsi vermədiyi üçün nəqliyyat vasitələri fəaliyyətsiz qalıb, nəticədə, müştəri aylıq ödənişləri edə bilməyib.

M.Qədimov yaşadığı problemi belə izah edir:

“Hər avtomobil üçün 8000 manat ilkin ödəniş etmişdim. Sənədləşmə gecikdirildiyi üçün avtomobillərim 10 gün dayandı, amma şirkət həmin günlərin də ödənişini tələb etdi. Bir neçə aydan sonra maddi sıxıntılarım yarandığı üçün 3 avtomobili satmaq istədim. Hər birinə 4185 manat cərimə hesablandığı ortaya çıxdı. Şirkət yol vərəqəsi vermədiyi üçün 2 aydır avtomobillər işləmir və ödəniş edə bilmirəm. Buna baxmayaraq, xəbərim olmadan maşınları dayanacaqdan götürüblər və indi satışa çıxarırlar. Ümumilikdə ilkin və aylıq ödənişlər daxil olmaqla 80 min manata yaxın pul ödəmişəm. Borcları bağlamaq üçün hətta evimi də satışa çıxarmaq məcburiyyətində qalmışam”.

Sözügedən lizinq şirkəti isə iddialarla razılaşmır:

“Vətəndaşın ödəniş etmədiyi müddət 5-ci aya keçir. Bir neçə ay əvvəl müqaviləyə xitam verilib və müştəri özü xitam məktubuna qol çəkib. Ödəniş olunmadığı üçün avtomobillər bir həftə ərzində satışa çıxarılır”.