"Şəxsi heyət bütün tapşırıqları yerinə yetirdi"

Müsəlman şərqində ilk demokratik respublika – Azərbaycan Xalq Cümhuriyyəti yarandıqdan sonra özünü xarici müdaxilələrdən müdafiə etmək, daxili düşmən qüvvələrini zərərsizləşdirmək üçün nizami orduya malik olmalı idi. Bu məqsədlə 1918-ci il iyunun 26-da Azərbaycan Xalq Cümhuriyyəti Nazirlər Şurasının qərarı ilə Əlahiddə Azərbaycan Korpusu yaradıldı. Həmin dövrdə şəxsi heyəti 25 min nəfər olan Azərbaycan Ordusunun 1920-ci ildə 40 min nəfərə çatdırılması planlaşdırılırdı. Lakin Bolşeviklərin Bakını işğal etməsindən sonra ordu quruculuğu prosesi yarım qaldı.

Azərbaycan dövlət müstəqilliyini bərpa etdikdən sonra hərbi sahədə ciddi böhranla üzləşdi. Ölkəmizdə peşəkar ordu quruculuğunun əsası 1993-cü ilin sonlarında qoyuldu. Ümummilli lider Heydər Əliyev hakimiyyətə gəldikdən sonra həm prezident, həm də Ali Baş Komandan kimi ordunu vahid komandanlıq ətrafında birləşdirdi və nizami ordu yaratdı. Məhz həmin vaxtdan ordu quruculuğunda elmi prinsiplər davam etdirildi, ordu siyasi təsirlərdən xilas oldu. Beləliklə, əsası Azərbaycan Xalq Cümhuriyyəti dövründə qoyulan şanlı ordumuzun tarixi ənənələri yeni müstəvidə qorunub saxlanıldı, inkişaf etdirildi.

Bu gün 105 yaşlı ordumuzun adı dünyanın aparıcı dövlətlərinin orduları ilə eyni səviyyədə çəkilir. Vətən müharibəsində qazanılan qələbə Azərbaycan Ordusunun mənəvi-psixoloji, döyüş ruhu, sosial, ictimai, silah-sursat, peşəkarlıq baxımından Ermənistan Ordusunu nə qədər qabaqladığını sübut etdi. Pilotsuz uçuş aparatları, müasir silah və texnikalar vasitəsilə düşmənə sarsıdıcı zərbələr endirildi. Bu gün silahlı qüvvələrimiz suda, quruda, havada, bir sözlə, bütün mövqelərdə Azərbaycanın ərazi bütövlüyünə yarana biləcək bütün təhdidlərin qarşısını alacaq gücdədir.