"Ulduz" stansiyasında "yanğın"

Metronun “Ulduz” stansiyasında təlim keçirilib.

Əvvəlcə Fövqəladə Hallar Nazirliyinin “112” qaynar telefon xəttinə metronun “Ulduz” stansiyası ərazisində yerləşən kabel kollektorunda elektrik avadanlıqlarında şərti yanğın baş verməsi barədə məlumat daxil olub. Dərhal Nazirliyin və Bakı Regional Mərkəzinin müvafiq qüvvələri hadisə yerinə cəlb olunub.

Şərti hadisə ilə bağlı Metropoliten əməkdaşları tərəfindən ilk olaraq stansiyanın bağlanması, tuneldə işçi işıqların yandırılması, təmas relslərindən gərginliyin kəsilməsi üçün qısaqapayıcıların pozulması, keçid qapılarının açılması işləri həyata keçirilib.

Təlimdən sonra nəticələr müzakirə olunub, FHN və Metropoliten əməkdaşları arasında təhlükəsizlik qaydaları ilə bağlı fikir mübadiləsi aparılıb. Təlimə ümumilikdə nazirliyin 4 texnikası və 30 nəfər şəxsi heyəti cəlb olunub.