"Ustalarda qalmışıq, pul çatdıra bilmirik" | Əhalinin baş götürüb qaçmaq istədiyi kənd - Baku TV

Oğuz rayonunun Sincan kənd sakinləri yol problemindən əziyyət çəkirlər.

Vətəndaşlar çətinliklə üz-üzə qaldıqlarını və gənclərin kəndi tərk etdiklərini bildirirlər.

“Yollara baxan yoxdur. Gənclər buradakı şəraitsizliyə dözmür, kəndi tərk edirlər”, – sakinlərdən biri söyləyib.

Digər bir vətəndaş isə vurğulayıb: “Yollarımız bərbad gündədir. Maşınımı ayda ən azı 2-3 dəfə ustaya aparıram. Yola bir az daş, çınqıl töksələr, bizim də canımız rahat olar”.

Məsələ ilə bağlı Azərbaycan Avtomobil Yolları Dövlət Agentliyindən bildirilib ki, Sincan kəndinə gedən yolun yenidən qurulması diqqət mərkəzindədir.

Qurumdan verilən məlumata görə, bununla bağlı təkliflər hazırlanaraq aidiyyəti üzrə təqdim olunub və kənd yolunun yenidən qurulması İnvestisiya Proqramına daxil edilib:

“İnvestisiya Proqramı çərçivəsində maliyyə vəsaitinin ayrılması gözlənilir. Vəsait ayrıldıqdan sonra sözügedən yolda əsaslı yenidənqurma işləri Agentlik tərəfindən həyata keçiriləcək”.