"Yaşayışım yoxdur, yığıb pul istəyirlər" - Çarəsiz süpürgəçi əlillik təyinatı ala bilmir? - Baku TV

Oğuz rayon sakini Xəlil Tanverdiyev Baku TV-yə müraciət edərək çarəsiz vəziyyətdə olduğunu bildirib.

Onun sözlərinə görə, gözü anadangəlmə zəif görür. İldən-ilə vəziyyəti daha da pisləşib və hazırda görmə qabiliyyəti çox aşağı səviyyədədir.

Vətəndaş deyir ki, bir neçə dəfə Şəki və Oğuz Rayon Mərkəzi Xəstəxanalarında olub müayinədən keçsə də, əlilliyin təyini üçün göndəriş ala bilmir.

Çətin şəraitdə və tənha yaşayan 59 yaşlı Xəlil Tanverdiyev aidiyyəti qurumlardan kömək istəyir.

“Gəlirim yoxdur. Süpürgəçi işləyirəm. Gözlərim görmür, əlillik təyin olunmasını istəyirəm. Yoldaşım da ayrılıb məndən. Uşaqları götürüb gedib”, – o deyib.

Akademik Zərifə Əliyeva adına Milli Oftalmologiya Mərkəzindən bildirilib ki, vətəndaş göndəriş alandan sonra Mərkəzə müraciət edə bilər. Xəlil Tanverdiyev isə vəziyyətinin çətin olmasının nəzərə alınaraq göndərişin vaxtının tezləşdirilməsini istəyir.

Xəlil Tanverdiyevin çətin şəraitdə yaşamasına gəlincə isə Oğuz Rayon İcra Hakimiyyətindən qeyd edilib ki, vətəndaşın əvvəllər bu və ya digər səbəbdən hər hansı müraciəti qeydə alınmayıb.

Çəkilişdən sonra RİH başçısının Oğuz şəhəri üzrə nümayəndəsi onunla evində görüşüb, pensiya təminatı haqqında hara və necə müraciət etmək lazım olduğu barədə müvafiq söhbət aparıb, maddi yardım göstərilməsi üçün rəsmi ərizəsi götürülüb. Yaxın müddətdə RİH tərəfindən maddi köməklik göstəriləcək.