“Report” İnformasiya Agentliyi 9 yaşını qeyd edir: əməkdaşlarla müsahibə

“Report” İnformasiya Agentliyinin fəaliyyətə başlamasından 9 il ötür.

2014-cü ilin bu günündə fəaliyyətə başlayan agentlik Azərbaycan, rus və ingilis dillərində fəaliyyət göstərir.

“Report” 9 ildə siyasət, iqtisadiyyat, cəmiyyət, idman, mədəniyyət və digər sahələr üzrə ölkədə və dünyada baş verən ən vacib hadisələri operativ şəkildə işıqlandırır. Oxuculara gündə 500-dən artıq xəbər çatdırılır.

Agentliyin xəbərlərini Azərbaycanın və regionun bir çox xəbər portalları, televiziya kanalları istifadə edir. Həmçinin “Report”un məlumatlarının 70-75%-i digər xəbər portalları tərəfindən də istinadla dərc edilir.

Hazırda “Report”un ölkə ərazisində müxbir postları mövcuddur. Agentliyin Rusiya, Türkiyə, Ukrayna, ABŞ və Fransada fəaliyyət göstərən xüsusi büroları isə həmin ölkələrdə baş verən mühüm hadisələri diqqətlə izləyir.

Agentlik Azərbaycanda ixtisaslaşmış jurnalistlərin hazırlığına da töhfə verməyə davam edir. Media sahəsində peşəkar kadrlar yetişdirmək, dünya mətbuatının yararlandığı müasir trendləri gənc jurnalistlərə aşılamaq məqsədilə agentlikdə Report Media Məktəbi fəaliyyət göstərir.

Məktəbdə tədrisin ən yeni üsullarla aparılması, gənclərin praktik bilik və bacarıqlarının gücləndirilməsi sayəsində onlarla gənc jurnalist "Report"da və digər KİV-də fəaliyyətə başlayıb.

Onu da qeyd edək ki, hazırda "Report" İnformasiya Agentliyi “Global Media Group” şirkətinin tərkibinə daxildir.