Rusiyalı kosmetoloqdan smartfonlarla bağlı təcili çağırış

Smartfonlardan həddindən artıq istifadə xarici görünüşə təsir edir.

Bu barədə rusiyalı kosmetoloq və dermatoloq Olqa Andriyanova “Gazeta.ru”ya müsahibəsində danışıb.

“Yatmazdan əvvəl sosial şəbəkələri nəzərdən keçirdiyiniz, rəfiqənizlə yazışdığınız və seriala baxdığınız pozaya diqqət yetirin, başınızı aşağı salmış vəziyyətdə olursunuz. Bunun nəticəsində boyun nahiyəsində qırışlar və ikinci buxaq əmələ gəlir, üz dərisinin sallanması prosesi güclənir.

Görünüşdəki bu cür dəyişikliklər “kompüter boynu” və ya “telefon boynu” adlanır. Əvvəllər bu hal daimi olaraq kompüter arxasında işləyən insanlar üçün xarakterik idi. İndi isə buna smartfondan çox istifadə edən hər ikinci şəxsdə rast gəlinir”, ‒ deyə Olqa Andriyanova bildirib.

Bundan əlavə, smartfonlardan aktiv istifadə qırışların yaranmasına və daimi göz yüklənməsi səbəbindən göz qapaqlarının dərisinin qocalmasına səbəb olur. Nəticədə, daha çox yorğun gözlər, partlayan kapilyarlar və gözlərin altında qara dairələr ortaya çıxır. Bütün bunlar insanı daha yaşlı göstərir və üzü qocaldır.

Bundan əlavə, smartfonlardan istifadə sızanaqların yaranmasına da səbəb ola bilər. Çünki telefonu üzünüzə sıxaraq patogen mikrofloranın yapışmasını təhrik edə və yanaq nahiyəsində sızanaqların əmələ gəlməsinə şərait yarada bilərsiniz. Buna görə də smartfonunuzu mütəmadi olaraq spirtli salfetlə silmək vacibdir.

Bütün yuxarıda deyilənlərin yekunu olaraq, kosmetoloq smartfonlardan istifadəyə sərf olunan vaxtı azaltmağı məsləhət görüb. O bildirib ki, bunun əvəzinə açıq havada daha çox vaxt keçirməyə, idmanla məşğul olmağa və yaxınlarınızla ünsiyyət qurmağa çalışın.