Ruslanın ailəsindən üzr istəyirəm | "Nikosayağı" məhkəmədə ifadə verdi

“Nikosayağı” kimi tanınan bloger Nicat Şakirlinin cinayət işi üzrə məhkəmənin baxış iclası keçirilib.

Bakı Ağır Cinayətlər Məhkəməsinin hakimi Samir Əliyevin sədrliyi ilə baş tutan prosesdə prokuror ittiham aktını elan edib.

İttihama görə, 2023-cü ilin avqustunda baş verən hadisə zamanı Nicat Şakirli içkili vəziyyətdə idarə etdiyi “Porsche” markalı avtomobillə yük maşınına çırpılıb.

Qəza nəticəsində blogerin avtomobildə olan dostu Ruslan Məmmədov vəfat edib, özünün isə qolu amputasiya olunub. Hakim müttəhimə tövsif olunan maddəni onun diqqətinə çatdıraraq bildirib ki, günahı sübuta yetiriləcəyi təqdirdə o, 5 ilə kimi nəqliyyat vasitələrini idarə etmək hüququndan məhrum edilməklə 5 ildən 8 ilə qədər azadlıqdan məhrum oluna bilər.

Qeyd edək ki, Nicat Şakirli sürət həddi 70 km olan olan yolda avtomobili 90-100 km sürətlə idarə edib. Təqsirləndirilən şəxs ona qarşı irəli sürülən ittihamla özünü tam günahkar bilərək məhkəməyə ifadə verib. Bloger ifadəsi zamanı hadisəni tam xatırlamadığını bildirib və qəza zamanı ölən dostu Ruslan Məmmədovun ailəsindən üzr istəyib. Qardaş qədər dogma olan bir dostunu itirdiyi üçün özünü günahkar sayıb. Qəza zamanı sükan arxasında sərxoş olması məsələsinə gəlincə isə o, hadisədən bir gün əvvəl spirtli içki qəbul etdiyini deyib.

Qeyd edilən əmələ görə, Şakirliyə qarşı Cinayət Məcəlləsinin 263-1.3 (yol hərəkəti və ya nəqliyyat vasitələrinin istismarı qaydalarını sərxoş halda və ya nəqliyyat vasitələrini idarə etmək hüququ olmayan şəxs tərəfindən pozma, eyni əməllər ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham irəli sürülüb.

Məhkəmənin növbəti iclası fevralın 27-nə təyin edilib.