“Ruslar gələndə döyüş oldu, sonra...” | “Xan bağı”nda nələr yaşanıb? - Baku TV

Baku TV Gəncənin ən məşhur istirahət məkanlarından biri olan “Xan bağı”ndan reportaj hazırlayıb.

Həm Gəncə sakinlərinin, həm də şəhərə gələn qonaqların sevimli istirahət ünvanlarından sayılan bu yaşıllıq zonası zəngin tarixi ilə diqqət çəkir. Müxtəlif bitki növlərinə ev sahibliyi edən “Xan bağı” əsrlər boyu Gəncənin tarixinin canlı şahidlərindən biri olub.

Tarixçi Bəxtiyar Məhərrəmovun sözlərinə görə, “Xan bağı” XVI əsrdə Gəncə bəylərbəyi Şahverdi xan Ziyadoğlu Qacar tərəfindən salınıb:

“Həmin dövrdə bağ indiki Bağbanlar qəsəbəsinin ərazisində yerləşirdi və Şahverdi xanın ailəsinin yaşayış məkanı kimi istifadə olunurdu”.

Onun sözlərinə görə, XVIII əsrdə Cavad xanın dövründə də xan ailəsi həmin ərazidə yaşamağa davam edib:

“Lakin 1804-cü ildə rus qoşunlarının Gəncəyə hücumu zamanı “Xan bağı” ərazisində şiddətli döyüşlər baş verib və bağa ciddi ziyan dəyib. 1846-cı ildə Qafqaz canişini təyin olunan Vorontsov bağın bərpası təşəbbüsü ilə çıxış etsə də, bunu həyata keçirmək mümkün olmayıb. Nəticədə, mövcud ağacların bir hissəsi köçürülərək şəhər qalasının daxilində yeni bağ salınıb. XX əsrin 30-cu illərindən etibarən həmin ərazi ictimai istifadəyə verilib və əvvəlcə “Lenin bağı” adlandırılıb. Sonrakı illərdə isə yenidən “Xan bağı” kimi tanınıb”.

Azərbaycan Dövlət Aqrar Universitetinin Bağçılıq kafedrasının professoru Zaur Həsənov isə bildirib ki, “Xan bağı” vaxtilə olduqca zəngin bitki örtüyünə malik olub.

Onun sözlərinə görə, iqlim şəraitinin dəyişməsi nəticəsində bir çox nadir ağac və bitki növləri zamanla məhv olub.

Professor bildirib ki, vaxtilə Gəncəyə gələn xarici qonaqlar və tacirlər bəzən müxtəlif ağac tinglərini vergi əvəzi kimi təqdim edirdilər:

“Məhz həmin tinglər hesabına bağın bitki kolleksiyası daha da zənginləşdirilmişdi”.