Sakinlərlə MTK arasında anlaşılmazlıq

Paytaxtın Nəsimi rayonunun Ağadadaş Qurbanov, Əli bəy Hüseynzadə, Cəlil Məmmədquluzadə və Balababa Məcidov küçələrində yaşayan sakinlər ərazidə söküntü işləri aparan Mənzil Tikinti Kooperativindən şikayətçidirlər.

Sakinlərin sözlərinə görə, şirkət onlara evlərini tərk etmək üçün yetərli məbləği ödəməyib və üstəlik, söküntü işləri onlar mənzillərini tərk etmədiyi halda aparılır:

“Gəldilər, buldozeri saldılar, evləri uçurtdular, dağıtdılar. Qoxudan, tozdan otura bilmirik. Ev də vermirlər, pul da. Lazım olan məbləği versinlər, buradan köçək”.

Mənzil Tikinti Kooperativinin müdiri Ramil Qasımov isə bildirib ki, sözügedən ünvanları əhatə edən ərazidə 150-yə yaxın fərdi yaşayış evi var ki, onların da sahibləri ilə danışıqlar aparılıb və mənzillərin 80 faizinə qədəri şirkət tərəfindən alınıb, söküntü işləri də buna əsasən aparılır.