Şəhərsalma və Arxitektura Komitəsi binanın sökülməsinə icazə vermir? | Sakinlər qorxu içində

Nərimanov rayonu, Vladimir Mayakovski küçəsi 15 ünvanında yerləşən bina qəzalı vəziyyətdədir.

Sakinlərin sözlərinə görə, 1932-ci ildə istismara verilən binanın müvafiq qurumlar tərəfindən sökülməsi ilə bağlı qərar qəbul olunub. Lakin Şəhərsalma və Arxitektura Komitəsi binanın sökülməsinə icazə vermir.

“Bu tikilini Fövqəladə Hallar Nazirliyi 2011-ci ildə qəzalı binalar siyahısına daxil edib. Şəhərsalma və Arxitektura Komitəsindən bizə hər dəfə səbirli olmağımızı deyirlər. Binadan hər gün daşlar tökülür. Hər an bədbəxt hadisə baş ver bilər”, – sakinlər söyləyib.

Problemlə bağlı Dövlət Şəhərsalma və Arxitektura Komitəsindən bildirilib ki, Bakı şəhərində mövcud olan qəzalı binaların inventarizasiya işləri aparılır:

“Həmin binaların həm özəl vəsaitin cəlb edilməsi, həm də dövlət vəsaiti hesabına mərhələli şəkildə yenilənməsi nəzərdə tutulur. Sözügedən ünvanda yerləşən yaşayış binası da qəzalı evlərin siyahısına daxildir. Yaxın müddət ərzində qəzalı binadakı sakinlərin köçürülməsi tərəfimizdən təmin ediləcək”.