Şengen vizasını almaq niyə müşkülə çevrildi? | Əhalinin ən çox üz tutduğu ölkələr açıqlandı

Şengen zonasına daxil olan Avropa ölkələrinə səyahətə icazə verən vizanı almaq müşkülə çevrilib.

Xaricə səfər etmək istəyən vətəndaşlar Şengen vizası almaq üçün səfirliklərin saytından görüş yeri ala bilmirlər.

Yerli turizm şirkətlərinə müraciət etdikdə isə yalnız VİP yerlərin mövcud olduğunu və bunun da qiymətinin azı 100 manatdan başladığını bildirirlər.

Turizm ekspertlərinin sözlərinə görə, məhz bu problemdən dolayı vətəndaşlar Şengen ölkələrinə getməkdən imtina edirlər.

Mövcud problemlə bağlı Dövlət Turizm Agentliyindən bildirilib ki, məsələdən xəbərdardırlar. Xarici ölkə səfirləri ilə ikitərəfli görüşlərdə viza prosedurları ilə bağlı vəziyyətin optimallaşdırılması üçün sözügedən problem mütəmadi olaraq qaldırılır. Məsələ müvafiq dövlət orqanlarının da diqqətinə çatdırılıb. Turizm sənayesi üzrə ictimai təşkilatlarla da həll yolları istiqamətində mütəmadi olaraq müzakirələr aparılır.

Qeyd edək ki, sözügedən sazişə əsasən, Avropa İttifaqına üzv dövlətlər vizanın rəsmiləşdirilməsi üçün kənar xidmət təchizatçısı ilə əməkdaşlıq etdiyi halda, kənar xidmət təchizatçısı xidmətlər üçün rüsum ala bilər. Bu rüsum öz işlərinin icrası zamanı üzləşdiyi xərclərə mütənasib hesablanmalı və 30 avrodan artıq olmamalıdır.