Şengen vizasını onlayn alacaqsınız

Pasportlara yapışdırılan vizalar 2D ştrix-kod şəklində rəqəmsal viza ilə əvəz olunacaq.

Avropa İttifaqı Parlamenti və Aİ Komissiyası Şengen zonasına daxil olan ölkələr üçün viza prosedurunun rəqəmsallaşdırılması ilə bağlı razılığa gəldiklərini açıqlayıb.

Qüvvəyə minməzdən əvvəl rəsmi təsdiq edilməli olan saziş Şengen vizası üçün müraciət edənlərin əksəriyyətinə əməliyyatlarını onlayn şəkildə həyata keçirməyə imkan verəcək. Vizaları mobil cihazlara yükləmək mümkün olacaq.

Viza ərizəçiləri internet üzərindən bir çox dillərdə müraciət edə, həmçinin vizalarını mobil cihazlara yükləyə biləcəklər. Sloveniyalı deputat Majtaz Nemec “Müraciət edənlər artıq daha asan, daha ucuz və daha sürətli viza prosedurlarından faydalanacaqlar”, – deyə bildirib.

Həmçinin İsveçin İmmiqrasiya Naziri Maria Malmer bildirib ki, yeni qərar vizaların kopyalanması, saxtalaşdırılması riskini daha da azaldaraq Şengen bölgəsinin təhlükəsizliyini artıracaq. Bəs bunun üçün hansı şərtlər tələb olunur?

Müraciət edənlər yalnız ilk dəfə viza üçün müraciət etdikdə, biometrik məlumatları etibarlı olmadıqda və ya yeni pasporta malik olduqda şəxsən konsulluğa getməli olacaqlar.

Bir şəxs birdən çox Şengen ölkəsinə səfər etmək istədikdə platforma qalma müddətindən asılı olaraq hansı ölkənin müraciətə baxmağa cavabdeh olduğunu avtomatik olaraq müəyyən edəcək.

Turizm məqsədilə 6 ay ərzində maksimum 90 gün müddətinə verilən Şengen vizası 22 Avropa Birliyi ölkəsi ilə yanaşı, İslandiya, Norveç, Lixtenşteyn və İsveçrədə də istifadə olunur. Aİ üzvü olsalar da, İrlandiya, Bolqarıstan, Rumıniya və Kipr Şengen zonasına daxil deyil.

2025-ci ilə qədər bütün viza prosedurunun rəqəmsallaşdırılması nəzərdə tutulub. Bu qərarın növbəti 5 ildə daha çox turistin müraciət etməsinə səbəb olacağı da gözlənilir.