Sərhədi pozan ermənilərin məhkəməsi başlayır
Azərbaycan-Ermənistan dövlət sərhədinin Zəngilan rayonunun Rəzdərə kəndi ərazisindən keçən hissəsində Ermənistan Silahlı Qüvvələrinin təxribat-diversiya qrupu tərəfindən Azərbaycan dövlət sərhədinin pozulması faktına dair Baş Prokurorluğun İstintaq idarəsində aparılan cinayət işinin ibtidai istintaqı tamamlanıb.
Baş Prokurorluğun məlumatına görə, istintaqla Ermənistan vətəndaşları olan hərbi qulluqçular – Ovagimyan Arutyun Yurikoviç və Kazaryan Karen Aşotoviçin başqaları ilə qabaqcadan əlbir olan bir qrup şəxs halında mayın 26-sı saat 19 radələrində dövlət sərhədini qanunsuz keçərək, odlu silah və döyüş sursatlarını qaçaqmalçılıq yolu ilə Zəngilan rayonunun Rəzdərə kəndinə keçirməklə ölkəmizdə terror aktı törədəcəkləri ilə hədələmələri, bu məqsədlə Azərbaycan hərbi qulluqçularına silahla atəş açaraq hücum etmələrinə əsaslı şübhələr müəyyən edilib.
İstintaqda həmçinin məlum olub ki, Ordumuzun hərbi qulluqçuları tərəfindən hücumların qarşısı qətiyyətlə alınıb və erməni diversiya qrupunun adları qeyd olunan üzvləri saxlanılıb. Bu zaman Ovagimyan Arutyun Yurikoviçdən cinayətin aləti olan 1 ədəd “Kalaşnikov” markalı odlu silah və içərisində 10 ədəd 5,45 mm kalibrli patronlar olan 1 ədəd daraq götürülüb.
Qeyd edək ki, Ovagimyan Arutyun Yurikoviç və Kazaryan Karen Aşotoviçə qarşı Cinayət Məcəlləsinin bir neçə maddələri ilə ittihamlar elan edilib və iş Ağır Cinayətlər Məhkəməsinə göndərilib.
![icon](/images/loading.png)