Səslərini tanıyırıq, üzlərini yox | Azərbaycan radioları keçmişdən bu günə: Nələr dəyişdi?

Noyabrın 6-sı Azərbaycan Televiziyası və Radiosu Günü olaraq televiziya və radio işçilərinin peşə bayramı kimi qeyd edilir.

Baku TV bu münasibətlə radionun görünməyən qəhrəmanları haqqında reportaj hazırlayıb.

Qeyd edilib ki, Azərbaycan müstəqillik qazandıqdan sonra ölkədə bir neçə radio yarandı. FM dalğasında yayımlanan radiolar musiqi, əyləncə xəbər və s. məzmunlu verilişlərlə, sözün əsl mənasında, insanların nəbzini tutmuşdu.

“Hər evdən, avtomobildən yeni yaranan müstəqil radioların “jingle”ları eşidilirdi. Radio aparıcıları populyarlaşmışdılar. Hər bir gənc radioda aparıcı olmaq arzusunda idi. Belə bir bir zamanda ulduzu parlayan radioçuların həyatı 180 dərəcə dəyişmişdi. Hər kəs o yerdə – səs gələn tərəfdə olmaq isəyirdi”, – deyə əlavə edilib.

“Dinləyicilər xəyallarında xanım aparıcıları hündürboylu, qarasaçlı təsəvvür edirlər”.

Bunu “Planet FM”in baş meneceri Nigar Məmmədova söyləyib və radionun onun üçün həyəcan demək olduğunu vurğulayıb.

“18 illik təcrübəmin 16 ili aparıcılıqla bağlıdır. Mən hər efirdə ilk gündəki qədər həyəcanlanıram. Radioda ilk dəfə öz səsini eşidəndə, fərqində olursan ki, onu səndən başqa eşidənlər də var”, – deyə N.Məmmədova sözlərinə əlavə edib.

Musiqi və Proqram Departamentinin rəhbəri Baba Hacıyev isə bildirib ki, doğru musiqi seçimi digər radiolarla rəqabət aparmağa kömək edir:

“Planet FM-də milli musiqilərlə yanaşı, heç yerdə səslənməyən süni intellektlə hazırlanmış mahnılar “playlist”imizə rəng qatır”.