“Sevdiyi qız can verəndə özünü çatdırdı” | Bayram kişini kövrəldən təsirli hekayə - O VAXTLAR

“O vaxtlar” verilişinin budəfəki qəhrəmanı Şabran rayonunun Dağbilici kənd sakini Bayram Ağasıyev olub.

Bayram Ağasıyev Novruz bayramı ilə bağlı qədim adət-ənənələrdən söz açıb.

Onun sözlərinə görə, bayram günlərində yaşlı nəslin qadınları bir yerə toplaşar, böyük qazanlarda səməni bişirərdilər. Kişilər isə ayrı bir otaqda yığışaraq söhbət edərdilər. Səməni hazır olduqdan sonra dualar oxunar, yeni ilə sağ-salamat çatdıqları üçün Allaha şükür edilərdi. Daha sonra bişirilən səməni bütün kənd əhalisinə paylanardı.

Şabran sakini keçmiş toy və ailə adətlərinə də toxunub. Bildirib ki, gəlin ata evindən köçən zaman bir-iki gün atasını və qardaşını görməzdi. Gəlin evdən çıxan gün atasının əlindən və ayağından öpərək halallıq alardı. Oğlanın atası isə gəlinin belindən üç dəfə qırmızı kəmər bağlayıb açar, başının üzərində çörək tutardı. Bu mərasim “xeyir-bərəkət aparasan, getdiyin evə uğur gətirəsən” anlamını ifadə edirdi.