“Şəxsiyyətimə dair nəyisə ələ keçirsələr...” | Poverbankların bilmədiyimiz təhlükəsi - Baku TV

Restoran, kafe və digər ictimai məkanlarda telefonlarımızı enerji ilə təmin etmək üçün saatlıq və ya dəqiqəlik ödənişlə təqdim olunan poverbanklardan istifadə edirik. Lakin çoxumuz bu cihazların yarada biləcəyi təhlükələr barədə düşünmürük.

Bəs istifadəçilər ictimai poverbankların risklərindən xəbərdardırlar?

“Şəxsi məlumatlarını qorumaq istəyirsənsə, ictimai ərazidə, hər hansı məkanda poverbankdan və ya başqa texnoloji vasitədən istifadə etmək düzgün deyil”, – sakinlərdən biri deyib.

“İndiki dövrdə link vasitəsilə də şəxsi məlumatları oğurlaya bilirlər. Ona görə də qurğu yerləşdirib bu kimi məlumatları ələ keçirmək mümkündür”, – başqa bir sakin qeyd edib.

IT mütəxəssisi Cəlil Qasımbəylinin sözlərinə görə, standart USB kabelləri yalnız elektrik enerjisi deyil, həm də məlumat ötürmək imkanına malikdir:

“Əgər ictimai yerlərdəki poverbanka kənar şəxslər tərəfindən zərərli proqram və ya xüsusi mikrosxem yerləşdirilibsə, telefonu qoşduğumuz anda zərərli kod cihaza sızır. Belə bir cihaza qoşulu olarkən mobil bank tətbiqlərinə daxil olmaq, ödəniş etmək və ya gələn linklərə keçid etmək böyük riskdir.

Telefonu poverbanka qoşduqda ekranda “Bu cihaza etibar et” bildirişi çıxarsa, qətiyyən təsdiq düyməsinə basmayın. Yalnız imtina seçimini edin. Mümkünsə, ictimai yerlərdə yalnız şəxsi adapter və poverbankınızdan istifadə edin”.