Silahlı Qüvvələr Günü münasibətilə silsilə tədbirlər keçirildi

Mədəniyyət Nazirliyinin təşkilatçılığı ilə Ağstafa şəhər Heydər Əliyev Mərkəzində Silahlı Qüvvələr Günü münasibətilə silsilə tədbirlər təşkil olunub.

Ağstafa şəhər Heydər Əliyev Mərkəzində xalqımızın zəfər ruhunu, qəhrəman əsgərlərimizin şücaətini və Qarabağımızın gözəlliyini əks etdirən "Zəfərin Ruhu" adlı səyyar rəsm və fotosərginin açılışı olub.

Tədbirdə Ağstafa Rayon İcra Hakimiyyətinin başçısı Seymur Orucov, mədəniyyət nazirinin müavini Murad Hüseynov, nazirliyin əməkdaşları, məsul şəxslər və ictimaiyyət nümayəndələri iştirak ediblər.

Ağstafa Rayon İcra Hakimiyyətinin başçısı Seymur Orucov 26 iyunun hər bir azərbaycanlı üçün təkcə bir təqvim bayramı deyil, həm də qəhrəmanlığın, cəsarətin və vətən sevgisinin təcəssümü olduğunu bildirib.

Müstəqil Azərbaycanın Silahlı Qüvvələrinin formalaşması və inkişafında Ümummilli Liderimiz Heydər Əliyevin müstəsna xidmətlərinin, Ali Baş Komandanımız, möhtərəm Prezidentimiz cənab İlham Əliyevin rəhbərliyi, uzaqgörən siyasəti və sarsılmaz əzmi sayəsində ordumuzun regionun ən güclü ordularından birinə çevrilidiyini vurğulanıb.

Daha sonra sərgiyə baxış keçirilib. Mərkəzin həyətindəki açıq konsert meydanında isə Fikrət Əmirov adına Gəncə Dövlət Filarmoniyası nəzdində Xalq Çalğı Alətləri Orkestrinin konserti baş tutub.