“Son dəfə görəcəyimi bilsəydim...” | Faciəvi şəkildə ölən Eltacın ailəsinin fəryadı - ARZUNUN VAXTI

Ötən ay Bakıda ofisiant işlədiyi restoranın yaxınlığında faciəvi şəkildə həyatını itirən 19 yaşlı Eltac Əliyevin ailəsi Baku TV-yə danışıb.

Mərhumun yaxınları deyir ki, Eltac qazandığı pulu öz arzuları üçün yığırmış. Onun ən böyük istəyi özünə avtomobil almaq olub.

Ailənin sözlərinə görə, Eltac bütün sirlərini bacısı ilə bölüşürmüş. Bacısı isə qardaşının itkisini hələ də qəbul edə bilmədiyini deyib:

“Əgər bilsəydim ki, Eltacı son dəfə görürəm, onu doyunca öpüb-qucaqlayardım”.

Faciənin ən ağır anlarından biri isə Eltacın ölümünün anasına necə çatdırılması olub. Heç kim bu xəbəri ona birbaşa deməyə cəsarət etməyib.

“Birdən qapılar açıldı. Geyinib çıxdığı evə ağ kəfəndə tabutu gəldi”, – deyə Eltacın bacısı deyib.

Mərhumun atası isə oğlunun ölüm xəbərini eşidəndə yaşadığı sarsıntını belə ifadə edib:

“Xəbər deyiləndə işdə idim. Xəstəxanaya gedəndə dedilər ki, Eltac morqdadır. Elə bil onurğa sütunum qırıldı”.