Su borularını və sayğacları don vurarsa hara müraciət etmək lazımdır?

Havaların kəskin soyuması su borularının və sayğacların donmasına gətirib çıxara bilər.

Bu problem əsasən də fərdi yaşayış evlərində qeydə alınır.

“Aidiyyəti qurumlardan bu məsələ ilə bağlı kömək istəyirik. Kimə müraciət edəcəyimizi bilmirik. Donma vaxtı nə etməli olduğumuz barədə məlumat versələr, sevinərik”, – deyə vətəndaş bildirib.

Məsələ ilə bağlı İri Şəhərlərin Birləşmiş Su Təchizatı Xidmətindən qeyd edilib ki, vətəndaşlar tərəfindən pərakəndə üsulla çəkilmiş su xətlərinin əksəriyyətində izolyasiya məsələləri nəzərə alınmayıb:

“Tövsiyəmiz odur ki, həmin xətlər ya izolyasiya olunmalı, ya da torpaq altına keçirilməlidir. Şaxtanın daha çox olduğu gecə saatlarında sayğac içərisində suyun qalmaması üçün giriş vintili bağlanmalı, çıxış vintili açıq saxlanmalı, qutusunun qapağı isə bağlı qalmalıdır. Donvurmadan mühafizə təbirləri məqsədilə sayğacların üzərinin isti materiallardan olan örtük və quru ağac yonqarları ilə əhatə olunması tövsiyə olunur”.