Su şəbəkəsinə qoşulmaq üçün prosedurların sayı endirildi

Azərbaycanda su şəbəkəsinə qoşulmaq üçün prosedurların sayı 13-dən 3-ə endirilib.

Bunu Azərbaycan Dövlət Su Ehtiyatları Agentliyinin nümayəndəsi Anar Cəbrayıllı "Su Şəbəkəsinə qoşulma" işçi qrupunun 2023-cü il üzrə Fəaliyyət Planının icra vəziyyəti və qarşıda duran prioritetlərlə bağlı keçirilən 10-cu iclası çərçivəsində jurnalistlərə açıqlamasında bildirib.

“İndiyə qədər Azərbaycanda sahibkarlıq subyekti texniki şərt alıb su şəbəkəsinə qoşulmaq üçün 13 prosedurdan keçirdi, bir neçə dövlət qurumuna müraciət edirdi. Amma bundan sonra "bir pəncərə" prinsipi ilə vətəndaşlar cəmi bir ünvana, məsələn, “ASAN kommunal” mərkəzinə və yaxud gələcəkdə elektron qaydada agentliyə müraciət edəcək.

Proseslərin hamısı vahid mərkəzdən idarə olunacaq. 3 prosedurdan birincisi texniki şərtin hazırlanmasıdır, 10 gün davam edəcək. İkinci prosedur layihənin hazırlanması və razılaşdırılmasıdır. Bu da 10 gün davam edəcək. 3-cü prosedur isə artıq fiziki tikinti işlərinin aparılmasıdır və obyektin, evin şəbəkəyə qoşulmasıdır. Bu da digər iki prosedur kimi 10 gün davam edəcək”, – deyə o qeyd edib.