Sumqayıt sakini 32 ildir evinə köçə bilmir | "Məni çıxara bilməyəcəksən"

Sumqayıt şəhər sakini Vəkil Verdiyev 32 ildir min bir zəhmətlə aldığı evdən didərgin düşüb.

Keçmiş məcburi köçkünlər onun boş mənzilinə girərək məskunlaşıb və illərdir evindən çıxmaq istəmirlər.

“Sumqayıtda şüşə zavodunda işləmişəm. Ev növbəsinə yazıldım. Qanuni ərizə ilə 20 il gözlədim, sonda dedilər ki, növbən çatıb. Mənə 4 otaqlı mənzil verildi. Bütün məhkəmə qətnamələrim var. Evimdə yaşayan xanıma müraciət etdim. O isə evimə qiymət qoyaraq “evini sat, 20 min ver mənə, onda buradan çıxaram” deyir”, – deyə şikayətçi bildirib.

Keçmiş məcburi köçkün Mehriban Hüseynova isə belə deyib:

“Bu evin qiyməti 120 min manatdır. Hərəmizə 10 min verilsə, çıxıb gedərik”.

Məsələ ilə bağlı Qaçqınların və Məcburi Köçkünlərin İşləri üzrə Dövlət Komitəsindən qeyd edilib ki, keçmiş köçkünün ailə tərkibinə uyğun olaraq, Dövlət Komitəsinin Biləsuvar rayonunda yerləşən qəsəbədə boş mənzil fondundan yaşayış sahəsi təklif edilib:

“Lakin o həmin mənzilə köçməkdən imtina edib. Bu səbəbdən Vəkil Verdiyevin məhkəmə qərarının icrası ilə bağlı aidiyyəti quruma müraciət etməsi qanunauyğundur. Keçmiş məcburi köçkünlər bərpa qrafikinə uyğun olaraq, mərhələli şəkildə doğma yurdlarına köçürülür. Qubadlı rayonunun Muradxanlı kəndi də bərpa edildikdən sonra ailənin köçürülməsi qanunauyğun formada icra ediləcək. Onun hazırda müvəqqəti məskunlaşdığı mənzil sahibinə təhvil veriləcək”.