Sümük iliyinin köçürülməsi artıq yeni klinikada da mümkün olacaq

Azərbaycanın səhiyyə sistemində yeni bir mərhələ başlayır.

Yeni Klinikada fəaliyyətə başlayan Yeni Robotik Reabilitasiya Mərkəzi və Sümük İliyi Transplantasiyası Mərkəzi artıq həm ölkəyə, həm də regiona xidmət etməyə tam hazırdır.

Yeni mərkəzlərin açılışı münasibətilə noyabrın 20-də təşkil olunan mediaturda TƏBİB-in rəhbərliyi, Yeni Klinikanın kollektivi və media nümayəndələri mərkəzlərlə yaxından tanış olublar. Jurnalistlərə hər iki mərkəzin fəaliyyət istiqamətləri, yeniliklər və planlaşdırılan tibbi xidmətlər barədə geniş məlumat verilib.

3600 kvadratmetrlik ərazini əhatə edən Yeni Robotik Reabilitasiya Mərkəzi ölkədə bu sahədə texnoloji inqilab yaradan ilk mərkəzlərdən biri kimi təqdim olunur. Burada nevrologiya, ortopediya, pediatriya, geriatrik, onkoloji və kardiopulmonar reabilitasiya daxil olmaqla geniş sahələr üzrə xidmət göstəriləcək. Mərkəzdə 3 həkim-fizioterapevt, 4 nevroloq, travmatoloq, təcili tibbi yardım həkimləri, 9 MBT təlimatçısı, 32 fizioterapevt-reabilitoloq və ümumilikdə onlarla tibb işçisi fəaliyyət göstərir.

Mərkəzin Neyrotravma şöbəsində kəllə-beyin və onurğa-beyin travmaları yaşayan, reanimasiyadan çıxmış pasiyentlərin stasionar bərpası həyata keçiriləcək. Robotik sistemlərin tətbiqi reabilitasiya prosesini daha dəqiq, daha təhlükəsiz və daha effektiv edir. Mərkəzin yaxın hədəfi beynəlxalq akreditasiyaların alınması və reabilitasiyada innovativ texnologiyaların daha geniş tətbiqidir.

Yeni Sümük İliyi Transplantasiyası Mərkəzi hemato-onkoloji xəstəliklər üzrə həm autogen, həm də allogen transplantasiyaların beynəlxalq protokollara uyğun şəkildə aparılması üçün qurulub. HEPA filtrasiyalı hava sistemi, tam izolyasiya rejimi və yüksək infeksion nəzarət standartları mərkəzin əsas üstünlüklərindəndir.

Hər iki mərkəz müasir tibbi xidmətlərin ölkədə genişlənməsi, müalicələrin əlçatanlığının artırılması və pasiyentlərə daha yüksək keyfiyyətli tibbi yardımın göstərilməsi baxımından mühüm əhəmiyyət daşıyır.