Sürücülərə xəbərdarlıq: Bunu edənləri 100 manat cərimə gözləyir!

Daxili İşlər Nazirliyinin Nəqliyyatı İntellektual İdarəetmə Mərkəzi (NİİM) operativ nəqliyyat vasitələrinin arxasınca qəsdən hərəkət edən sürücülərə xəbərdarlıq edib. Bu qanun pozuntusu nəqliyyat sıxlığı zamanı bəzi sürücülərin polis, təcili tibbi yardım, yanğınsöndürən və digər xüsusi təyinatlı avtomobillərin yaratdığı boşluqlardan istifadə edərək sürəti aşması, ara məsafəsini və manevr qaydalarını pozması ilə ifadə olunur. Bu hərəkətlər təkcə qəza riski yaratmır, həm də operativ avtomobillərin ünvana vaxtında çatmasına mane olur. “Yol hərəkəti haqqında” Qanuna əsasən, xüsusi təyinatlı avtomobillərin müşayiət etdiyi dəstəyə qoşulmaq qadağandır və İnzibati Xətalar Məcəlləsinin 331-ci maddəsinə görə, bu qaydanı pozan sürücülər 100 manat məbləğində cərimə edilir.