Taksilərdəki qiymət artımı ilə bağlı rəsmi açıqlama

Sosial şəbəkələrdə ölkədə fəaliyyət göstərən özəl taksi şirkətlərinin qiymətləri artırdığı barədə xəbər yayılıb.

İddia edilir ki, iyulun 24-dən etibarən kilometr və hava şəraitindən asılı olmayaraq, bütün özəl taksilərdə minimum qiymət 2 manat 50 qəpikdən hesablanır.

Ekspertlər şirkətlərin bu addımını süni qiymət artımı kimi qiymətləndirirlər.

Nəqliyyat üzrə ekspert Adil Nəbiyev qeyd edib ki, qiymətlərə təsir edə biləcək heç bir dəyişiklik olmadığı halda süni qiymət artımı yolverilməzdir: “Bu cür halların baş verməsinin bir səbəbi də odur ki, onlayn taksi platformalarının idarəetmə sistemi ölkə daxilində deyil, ölkə xaricindədir. İstədikləri vaxt qiyməti özləri tətbiq edirlər”.

Məsələ ilə bağlı Yerüstü Nəqliyyat Agentliyinin mətbuat katibi Tural Orucov bildirib ki, taksi daşımalarında qiymətlər tələb-təklif əsasında tənzimlənir: “Mövcud vəziyyətdə bəzi taksi sifarişi operatorları öz maliyyə imkanları hesabına qiymət siyasəti tətbiq edirlər. Bu kimi addımlar haqsız rəqabət mühitinin yaranmasının başlıca səbəbidir”.

Tural Orucov onu da qeyd edib ki, bütün hərəkət iştirakçılarının maraqlarının qorunması, eləcə də haqsız rəqabət şəraitinin qarşısının alınması məqsədilə agentlik taksi sifarişi operatorlarına daşınmaların subsidiyalaşmasının dayandırılması barədə məlumat verib.