Taksilərlə bağlı yeni tələblər müəyyənləşdi | Hansı dəyişikliklər olacaq?

Nazirlər Kabineti “Müntəzəm və taksi minik avtomobili ilə sərnişin daşımalarında istifadə olunan avtonəqliyyat vasitələrinin texniki göstəriciləri, daxili və xarici tərtibatına dair tələblər”i təsdiqləyib.

Qaydalarda bildirilib ki, müntəzəm sərnişin daşımalarını yerinə yetirən avtonəqliyyat vasitələri “Yol hərəkəti haqqında” qanuna uyğun texniki cəhətdən saz vəziyyətdə saxlanılmalıdır.

Taksi minik avtomobillərinin salonu isitmə və sərinləşdirmə funksiyalı tam havalandırma sistemi ilə təchiz edilməlidir. Taksilərə bütün salonunu əhatə edən və qeydə aldığı məlumatları ən azı 1 ay müddətində saxlaya bilən yaddaş qurğusu ilə təchiz edilmiş videokameralar quraşdırılmalıdır.

Yeni qaydalarda müntəzəm sərnişin daşımalarda və taksi minik avtomobili ilə sərnişin daşımalarda avtonəqliyyat vasitəsinə qoyulan rəng tələbi də öz əksini tapıb.

Qərara əsasən, müntəzəm şəhərlərarası sərnişin daşımalarında istifadə olunan avtonəqliyyat vasitələrinin rəngi ağ, şəhərdaxili və rayondaxili sərnişin daşımalarında istifadə olunan avtonəqliyyat vasitələri qırmızı, şəhərlərarası rayonlararası və şəhərdaxili (rayondaxili) sərnişin daşımalarında istifadə olunan elektrik mühərrikli avtonəqliyyat vasitələri isə yaşıl rəngdə və taksi minik avtomobillərinin ağ və ya qırmızı rənglərdə olması müəyyən edilib.

Taksi minik avtomobilləri ən azı “avro-5” ekoloji standartına uyğun olmalıdır.