Tədbirdə marketinqin gələcəyində süni intellektin rolu müzakirə edilib - Baku TV

“Facemark” şirkətinin təşkilatçılığı ilə keçirilən XI Milli Marketinq Forumu uğurla başa çatıb.

“AI işığında” konsept mesajı ilə təşkil olunan tədbirdə marketinq, kommunikasiya, biznes və kontent sahələrini təmsil edən 500-dən çox iştirakçı bir araya gəlib.

Forumun açılışında “Facemark” şirkətinin təsisçisi Rafiq Hunaltay kontent ekosistemində baş verən dəyişikliklərdən və gələcəyin imkanlarından danışıb.

Forum çərçivəsində müxtəlif panel müzakirələri və çıxışlar təşkil olunub. “AI işığında brendlər” adlı ilk paneldə süni intellektin marketinq strategiyalarına, brendlərin inkişafına və istehlakçı davranışlarına təsiri müzakirə edilib.

“Marketinq kommunikasiyaları” panelində dəyişən kommunikasiya tendensiyaları, brendlərin istehlakçı ilə əlaqə modelləri və müasir marketinq yanaşmaları ön plana çıxarılıb.

Forumun yekun hissəsində “Kreativ sənayenin təkamülü” mövzusunda panel keçirilib. Müzakirələr zamanı süni intellektin yaradıcılıq proseslərinə təsiri, kreativ sənayenin transformasiyası və gələcəyin yaradıcı iqtisadiyyatı ətrafında fikir mübadiləsi aparılıb.